我Bingo咗！但係。。。。。

幾經辛苦，過咗兩個半月。減咗肥、食咗中藥，但仲未bingo，壓力好大。正想叫老公去驗精之際，M小姐突然早咗10日嚟。從來未試過咁，好擔心，即打電話約婦科西醫。

六月頭，Day 8去見佢。照完超聲波佢叫我今個月唔駛徙心機，因為我完全無排卵，一定唔會bingo。我好想喊，點解會咁？！今次醫生終於肯比藥我。當時我成個人癲晒，好嬲好唔開心，明知係咁就唔好徙我三個月時間，一早比藥我咪仲好。而家佢要我day 12開始食Estrofem, 然後day 16 加埋Provera (通經藥) 一齊食。佢話想我今個cycle快啲完，下個cycle嘅day 2 至 day 6 就食排卵藥Clomid，希望幫到盡快懷孕。

見到啲藥，我返而開心咗，因為西藥始終快見效啲，彷彿比咗個希望我。咁究竟喺西醫嘅角度我係咪有卵巢多囊症 (PCOS)？醫生說10分算最嚴重，我的情况最多值2分。咁唯有見步行步啦。

我day 14 去睇孟煒。同佢講完西醫話我「乜卵都無」之後，佢就開咗六帖排卵藥比我，唔駛等下個cycle食Clomid先排卵。當晚食完一帖中藥後dodo，就係咁，day 30 我驗到自己有咗！我勁開心，但係。。。。。。

同時勁擔心，因為開心唔夠三個鐘，我就發現有流啡的問題。即去見醫生，抽血，HCG=9。呢個數無代表性，醫生話可能係太早，乜都驗唔到。第二日再驗，HCG=18；對於確定懷孕，呢個數仍然係太低。過多三日，HCG=180，終於有望了。

可是一直也流啡，甚至間唔中流兩滴血。唔知點解，我感覺到唔太樂觀。一個星期後覆診，HCG=3600，仲有流啡，照到胎囊但無心跳。十日後西覆診，胎囊長大咗但依然無心跳。再過一個星期，胎囊縮小。就係咁，當晚做了刮宮，一切成泡影，那是9W1D。

醫生說我沒做錯任何事，此情况很普遍，醫學名稱叫Blighted Ovum (俗稱「空心蛋」)，五個孕婦有一個係咁，屬於自然流產，唔會影響到下次嘅機會喎。

講就簡單，但我真係好傷心。其實對於我來說，今次屬於意外懷孕。成個cycle只係day 14 dodo過，我都唔知究竟係孟醫師的藥力勁，抑或西醫斷錯症話我無排卵，總之我無諗過會中。或者係天意，時辰未到，有咗保唔住。希望身體快啲好番，再嚟過。

神醫孟煒(2)

其實我無懷疑過西醫，只是他無藥比我食，我又心急想bingo，成日囉囉攣，所以找中醫幫我調理。孟煒醫師開過給我的藥方，我希望藉此記錄一下。我並非想有緣看到這個blog的你跟著服，因為這是醫師依我的個人體質開出的，不是對每個人都有用。

2011年5月24日

肉蓯蓉12g            當歸12g              柏子仁12g      巴戟12g         麥冬12g         天冬12g

桔梗12g         黨蔘12g                木香6g            黄芩12g         甘草10g

2011年5月31日

益母草15g        仙鶴草15g            黃花30g         桔梗15g         玉米須30g           

生蒲黃10g        山葯12g                蓮子12g         炒荊芥9g       炙甘草10g           

炙附子10g        莪朮10g

2011年6月7日

白芍12g                當歸12g                菟蕬子12g    儲麻根12g            柴胡6g            山葯12g

炒荊芥9g              炙附子10g             炙甘草10g    熟地30g                蓮子12g         木香6g

2011年6月14日

路路通9g        炙香附9g          威靈仙15g      白芍20g           炙甘草10g         當歸12g     
仙靈脾12g       紫石英30g       菟蕬子12g       巴戟12g           鹿角霜30g        鹿角膠12g

（這帖屬《促排卵湯》加減方，Day 11-16服！而仙靈脾就即係中藥偉哥，亦即淫羊藿。）

2011年6月21日

茯神15           茯苓12g                白芍20g         白朮6g            丹皮9g         炙香附9g

天花粉12g     當歸12g                素馨花6g       玫瑰花6g       鈎藤15g

2011年6月28日

菟蕬子20g      百合10g                麥冬12g         白芍12g         炙甘草10g    陳皮6g

川續斷6g        桑寄生6g              黨蔘12g         白朮6g            生薑6片

見咗孟醫師咁多次都無針炙過。佢話有需要針的話，佢自然就會提出，唔需要我提佢喎！


(寫於2011年8月)

神醫孟煒(1)

在我瘋狂上網揾資料醫病之際，我找到了孟煒醫師。我唔想神化佢，只是我一向睇開、同我極夾的大埔神醫一口咬定我無卵巢多囊症，仲叫我千祈唔好對號入座令自己壓力大增，越攪越衰；加上大埔神醫唔做針灸，而西方醫學又相信針灸對此病情有幫助，所以我才萌生轉醫師的念頭。

我算好好彩，我認識孟煒正是她剛由浸大轉職往港大的時候。我3月中打電話去預約，5月下旬就有機會見佢。在大學的網頁裡，她的簡歷是這樣的：

「孟煒博士畢業於黑龍江中醫藥大學，主修中醫婦科專業，來港履新前任上海中醫藥大學附屬岳陽中西醫結合醫院主任醫師、教授、婦科主任、婦科教研室主任、博士生導師、上海中醫婦科學會副主任委員。孟博士2003年入選國家中醫藥管理局優秀中醫臨床人才，2007年獲得全國首屆百名傑出女中醫師稱號；從事中醫臨床、教學工作二十多年，擅長婦科經帶、胎產、雜婦科疾病的治療，尤其對婦科子宮肌瘤、卵巢囊腫、女陰白色病損、卵巢功能早衰、痛經、妊娠劇吐、復發流產等疾病具有較深入研究。」

我唔知佢算唔算勁，但第一次見她，她給我的感覺係佢個人自信心好强。佢一把完脈就challenge我，問我點解認為自己有卵巢多囊症。嘩！唔係我自己話喎，係西醫同我照完超聲波然後斷症的。孟醫師好肯定咁同我講照一次超聲波信唔過。她說壓力會影響排卵，人嘅身體狀況又未必個個月一樣，咁單靠一次嘅超聲波根本唔可以作準。聽落好似好有道理、好科學化。然後佢叫我去驗血。佢寫了幾組英文字 (FSH、LH、PRL、E2、T、Anti-Sperm AD)，話係賀爾蒙名稱，叫我經期第2至5天去驗。

後來上網查才知道，那些賀爾蒙數據的確可以斷定我是否有卵巢多囊症。好勁呀，真係估唔到中醫都識得呢的嘢！

好彩我有家人開化驗所，於是經期一到我就去驗。結果：

LH = 1.80

FSH = 5.20

Prolactin = 16.09

Estradiol = 28.03

Testosterone = 59

Anti-Sperm AD = Negative

通常LH：FSH比值大於或等於3的話，可以判定是卵巢多囊症患者。好明顯，我的賀爾蒙數字好正常。就係咁，孟醫師認為我並非多囊性卵巢症患者。咁西醫豈不是斷錯症！

更多孟煒醫師的資料可按此處。

(寫於2011年6月)

卵巢多囊症 - 減肥篇

卵巢多囊症 的主要病徵 － 體毛多，我無；暗瘡，我無；血糖高，我無；癡肥，我諗，我無。

根據網上找到的醫學意見，我唯一可做嘅就係減吓肥。我BMI=23.1，或者以香港人或者日本人嘅標準，我應該至少要減到BMI=22。即係大約要減8磅。

 

從前我無飯不歡，現在我以蛋、肉、菜來滿足自己，盡可能戒食殿份質。另外，為保持鈣質吸收，本應該多飲牛奶。但我有乳醣多耐症(Lactose Intolerance)，飲牛奶會令腸胃不適，所以早餐我食*芝士雞肉奄列加一杯豆漿，或者乳酪加多士。最好就買到Fortified Soymilk，咁萬一有咗都可以補充鈣質。有時忍唔住，我會食兩塊麥維他消化餅，貪佢有纖維素。中午就食油菜全走加淨魚蛋或墨丸。晚上就食蒸魚／蒸雞／蒸肉餅加少許紅飯，然後食生菓，再飲杯Metamucil。

另外，我每日食400mcg Chromium同做半小時運動。唔算劇烈，但在家跳下aerobic，跑下跳下拉下根至出汗。

就係咁，三個月我已經減咗8磅。唔算辛苦，希望生到啦。

*其實芝士都有乳醣，但一片已含成人一天四份一的鈣質所需。除笨有精。

(寫於2011年6月)

我要生BB！

本來我對於要唔要BB採取順其自然的態度。最好就有啦，因為我覺得有下一代人生至圓滿。我年紀唔算大，加上身體一直都無乜問題，所以我諗應該只係時間問題啫。

突然想要BB，是2011年3月頭的一次例行婦科檢查中，醫生說我患了卵巢多囊症。我對這個病都略有所聞，因為我有位好想生仔的朋友早我一個月知道自己得了這病，然後從此戒甜戒澱粉。好可怕。

雖然醫生說我情况輕微，無比藥我，叫我乜都唔駛做，試三個月後都無好消息才返去覆診；但病始終係病，我好難唔上心。

呢個病基本上無得醫。雖然唔係絕症，但間接直接話比我聽兩件事：(一)可能以後無得生，(二)可能遲啲會有糖尿病。我係緊張大師，無嗱嗱話我可能以後無得生，我好唔開心。就係咁，我好恨生BB。於是我瘋狂上網揾方法，希望在病情惡化前可以生到。