外賣產後補品 － 沒有陪月的坐月子服務

這是我最近從朋友得知的無須請陪月，但又有產後補品送到屋企的坐月子服務。好有創意，值得分享。

由於產品及服務種類繁多，請自行到天研康食療網頁。

我們第一個母親節

Happy Mothers' Day.  我第一次做阿媽慶祝這個節日，好有感觸。希望我BB以後每一年都同我過。現在我陪佢，將來佢陪我。

這個香橙芝士蛋糕係工人姐姐做的。食譜將會在此分享。

尿片 尿疹膏

真係接受唔到，現在連尿片都要搶。

昨天去萬寧，店員話只賣剩兩包Pampers，心知不妙。今天看新聞，終於知道發生乜事－－碼頭工潮影響部份尿片斷貨。還有，水客搶日本尿片 港爸媽叫苦。

我BB用開Pampers特級棉柔，見萬寧賣剩兩包，我怕工潮持續，日後更難入貨；咁啱有朋友介紹Moony尿片，於是買了一包試一試。雖然兩者都是日本進口，但Moony比Pampers薄身，而且吸水力更強，亦比較乾爽透氣。初初用Moony，我不太習慣。原因係佢吸濕力太強，我以為BB無屙尿，還擔心他是不是飲唔夠奶。後來我才發現，晚上用Moony最理想，即使BB睡著了，10-12小時無換片，都唔會覺得條片好脹，亦無漏尿跡象。我想，當家中的Pampers存貨用完時，我唔排除會轉用Moony。惟Moony並非隨處買到，所以有可能要一次過大量入貨，家中要預留位置儲存。

 

其實BB出世頭20日，係用Huggies 0碼尿片。這是市面最細嘅尿片。我BB出世6磅半，著佢好似fit啲。但Huggies出名防漏，因為材料以膠為主，我怕焗住BB pat pat，所以20日後，轉用Pampers細碼。

 

當BB出院回家，我們發現佢有尿疹。陪月姐姐話，這是因為醫院人手不足，通常不會太頻密換片，更不會塗尿疹膏，所以BB有尿疹係常見情況。只要回家後保持BB pat pat 清潔乾爽，尿疹就好快消失。

至於尿疹膏，陪月姐姐介紹Mustela Vitamin BarrierCream；我當然照著買。但穩陣起建，我也同時買了Johnson & Johnson 嘅Desitin。Desitin質地比較稠杰，個人覺得防止尿尿接觸皮膚功效會顯著一點，所以我主要幫BB搽Desitin，果然幾天後尿疹就消失，keep住用Desitin，尿疹亦沒再出現過。

 

 

 

每次幫BB換片抹pat pat，都係用思詩樂棉花加和暖水，輕輕拭抹。後來BB大個，皮膚不像初生嬰兒般嬌嫩，又貪方便，於是久不久有用Huggies的Natural Care Baby Wipes。BB用得so far so good。

雖然尿片及以上產品的暫時短缺情況不會令BB造成生命危險，但始終是湊B重要物資，希望各位盡快買齊貨，應付日常所需。

 

請工人

我一直都沒有僱用外傭。我怕有個外人住在同一屋簷下，會失去私隱；也怕有工人做晒所有家務，令BB甚至自己養出惰性。

但經過兩個多月的全職家庭主婦兼湊B實戰經歷後，我終於明白，即使我有鐘點工人每星期來兩次、每次三個鐘，解決重型工作，例如燙衫、換床單、抹窗、洗廁所等；我一個人根本無辦法做完每天基本家務，包括洗衫、涼衫、煮飯、洗碗和拖地。主要原因係有了BB，衛生標準要提高，工作量大增。我完全無時間花Quality Time 比BB，無機會唱歌比佢聽，更加唔駛講上網研究搵學校。最大問題係我完全唔出得街，三個月無同老公撐過檯腳，嚴重影響夫妻情趣。我終於向老公投降，決定要請工人。

同Agent攪了一輪，等了兩個幾月，工人姐姐終於上班。雖然唔係好慣屋企多咗個人，但我終於可以出街扮吓靚，上吓網，同朋友High Tea輕鬆吓。同時也可以花多點時間給BB、給老公。

曾幾何時，煮嘢食、焗蛋糕，係我至愛。因為大肚停了一輪；現在有了工人，我做煮，佢善後，真係輕鬆好多。我甚至開始鑽研嬰兒食譜，希望為BB做出色香味美。

坐月 沖涼 洗頭

坐月真是一件好複習的事。常聽長輩說坐月其間要如何、如何，否則又如何、如何；一日未試過始終唔會感受到過中襖妙。這裡是我回憶中的坐月情況和感受。

其實，自產前兩個月起，我每天起床時，雙手的手指關節都有點痛。我一直擔心這會否是與我在懷孕其間豪無避忌地，又無帶手套，經常用自來水洗碗有關。但，這種痛楚反而在產後就消失了。

生產後，全身都感覺好疲累。在醫院其間，我沒有沖涼。主要係醫院長期開著冷氣，怕會著涼。同時，由於我是剖腹生產，傷口多少有點痛，而嘉諾撒醫院房間浴室當時只有浴缸，沖涼必須跨出跨入，動作頗大。我怕弄到傷口，所以決定回家後才慢慢潔淨身軀。我奶奶有用暖壺帶薑水給我洗手，感覺上的確係比用水喉出來的溫水舒服。

從醫院出來，真係覺得自己好臘躂。醫院充滿細菌，而且房間的布簾間格不知多少天才換一次(我留院五日四夜其間未換過) ；每日有不同的人開開關關，所有塵都跌落我的頭上，我真係頂唔順。我無可能接受到傳統坐月規矩要一個月唔洗頭，仲要抱BB、埋身餵奶，甚至同BB同床睡覺，將所有菌都傳晒比佢。回家時，陪月芬姐已經準備好桂枝桑皮水給我沖涼兼洗頭。好痛快。之後我就隔天才沖涼，由頭洗到腳。但由於惡露未清，所以每天都用溫水加Lactacyd清潔重要部位。另外每日吃Acidolphilis(益生菌)避免陰道炎。

隔天才沖涼其實都唔係容易頂。產婦在坐月其間正常會大量出汗，這是身體自行將在懷孕其間積聚體內的水份排走的天然過程。未懷孕之前我好難排汗，係做完半個鐘劇烈運動都唔出汗的人。但坐月其間，我就大汗踏細汗，頸部要長期披條毛巾吸汗。雙腳腳底都勁出汗；但因家用磚地板，腳底直接接觸地板較易著涼，所以我長期穿上襪子或拖鞋。當然，我沒開風扇或冷氣。坐月一定唔可以病，對自己對BB都唔係咁好。我想，這都是Common sense。

食療方面，除了每天飲代茶之外，主要飲石崇魚湯、花膠湯及鮑魚湯。由於我剖腹生產，傷口頗大，這幾款湯對產後復元最有幫助。石崇魚比較難買得到。產前老公在魚擋一次過買了三十斤，經處理後全部放在冰箱內，每天煲湯用三條，於午餐時間飲用，飲足一個月。有人話石崇魚有助上奶，但在我身上就唔係好work。餸菜菜色主要係蒸魚、雲耳蒸雞、洋蔥豬扒、梅菜蒸豬肉、清炒菜心、節瓜甫、冰糖燉木瓜等。謝絕所有菇類、牛肉和蛋，避免傷口發炎。順帶一提係有中醫提我要多吃勝瓜，幫助上奶，但奶奶和陪月都話勝瓜係寒涼食物，唔比我食。

產後大約兩星期，子宮收縮，都幾痛，有兩天起床時差不多落唔到地。BB晚上隨時喊，甚至要抱天光，所以我盡量趁陪月員上班時休息、睡覺。除了回診所檢查之外，坐月期間沒出過街。

這樣的生活，我堅持了三個月。可能是由於排汗多或湊BB未熟手，產後一個月我就回復懷孕前體重。但隨著BB滿月戒夜奶，我有覺左瞓又可以補身及食薑醋後，我的體重就開始返彈。現在正積極收身，目標減10磅，希望成功啦。

請陪月(2)

鄰居剛剛生了BB，昨天出院回來。新手爸爸今天下午突然按門鈴，很慌張地問我們借奶樽奶咀。幸好我有大堆嬰兒贈品，可以轉贈給他們解決即時所需。

原來他們用明火㷛水烚奶樽，結果全部奶樽奶咀都燒焦了。問他為什麼不買新式的消毒器，他說那是因為太太認為用滾水烚奶咀會令奶咀較容易軟化，方便BB啜奶。

這是個很奇怪的想法，原因是蒸汽比滾水高溫，如奶咀經同等時間的蒸煮，會比用滾水烚更快變軟。其實，不論選擇用哪種方法，奶咀都應該要預早於產前蒸或烚十次八次，讓BB一回家就有已弄軟了的奶咀用。

這位鄰居家中有傭人亦有兩老，結果意外還是出現。我深感陪月員的重要。

請陪月是一門學問。由於每個家的佈置及物品都不同，一個有經驗的陪月員通常會主動要求在到你家面試。只有這樣她才能了解工作環境，評估她的工作及告訴你要預備什麼物品。例如她會想知道你家中有沒有足夠的煮食器材。湯煲是否夠大？有幾多個？是不是可同時煲湯及沖涼薑水(或其他藥材水)。BB在哪裡沖涼最安全？哪裡最適合餵奶？等等。如果是24小時陪月，她還會想知道會在哪裡睡覺。我想這些都是頗合理的。

陪月員來家面試，除了要留意她的儀容外，還應準備問題去問她，以下是個人建議：
 

1)湊過幾多個新生嬰兒？

考慮：越多越有經驗，亦可能收費越貴。

2)有無培訓證書？如有，是哪個機構發出？考試是否合格？

考慮：

持有僱員再培訓局頒發合格證書的陪月員比較有信心保證。常見的陪月培訓機構有明愛、香港基督教女青年會等。也有陪月中心自行頒發證書給完成了它們課程的陪月員，是否值得信賴，便要自行定奪了。

3)幾耐會幫BB剪一次指甲？

答案：手甲，每隔一至兩天；腳甲，每隔一至兩星期。在BB睡著了才剪。(BB的手指甲面積小，相對大人長很比較快。為免BB抓傷自己，應剪手指甲剪得密一點，否則要經常帶手套。)

4)沖涼步驟係點？點探水溫？

答案：嬰兒一般在下午較暖和的時間洗澡為佳。冬天應提早開暖爐，至房間溫暖了，才調較暖水沖涼。用手肘測試水溫(約攝氏36-37度)；先洗頭，然後將BB放回床上除尿片，稍為用暖水清潔下體後，才除衣服落水沖涼。BB落水後先用弄濕了的毛巾鋪在心口上，這樣可讓他有安全感。沖洗完後，換好衣服，最後才用暖滾水和棉花抹面。

5)會唔會負責㷛薑醋？

答案：多數會額外收費。

6)會唔會㷛水給媽媽沖涼？

考慮：薑水？薑皮水？桂皮桑葉水？最好先自行問中醫哪一種最適合自己。如用薑皮水，應問陪月誰負責預備薑皮。

7)會做什麼補品、湯水及膳食給媽媽？

考慮：是否適合剖腹或順產媽媽？是否需預早買定材料？有些陪月介紹食名貴藥材（如冬蟲夏草），需自行定奪是否能負擔，並與商量是否可改用其他藥材。

8)有無急救證書？

考慮：最好有啦！

9)可否介紹上班流程？(洗手？換衫？)

考慮：洗手及換衫？會不會穿牛仔褲湊BB？先煲落湯才湊BB？

個人覺得經驗和口碑比所有東西重要。的確有好多嘢唔可以齋講，臨場表現最重要。好似煮飯煮得好唔好食，換片換得好唔好，抱BB的手勢等，都係面試比唔到答案。如果可以，能安排即場煮食，看看是否符合僱主口味就最好；甚至用公仔示範掃風及沖涼等手勢就最理想。

這是我對請陪月的一點經驗，在此和各位準媽媽分享，希望能給各位少少靈感。

搶奶粉

我知，我知，其實賣斷市嘅奶粉只係有3隻牌子。「賣斷市」都叫做有希望用高價搶購得到。我要嘅係全球停產嘅奶粉，有錢都未必買到。

未必人人都理解我嘅心情，有部份人甚至覺得我癲，覺得我亂攞BB來玩。左丁山在他的轉欄提過「所有醫生都話任何牌子奶粉無甚分別」；用西方的醫學角度分析，的確如是。事實上，我產前花了不少時間研究奶粉營養標籤，得來的結論也如是。但為什麼實驗證明，我的BB唔係隻隻奶粉都啱食？為什麼被搶購嘅只係有3隻牌子，而不是所有牌子？傳統智慧又怎麼常說S26熱氣呢？

會唔會因為製造過程不一樣，所以即使成份一樣，做出來的奶粉質素會不一樣？抑或，是每個BB的腸胃不一樣，所以對一樣的奶粉有不同的反應？講真，我比較相信前者；否則，好難令我明白為甚麼「任何牌子奶粉無甚分別」，偏偏有3隻牌子特別搶手。

 

 

同樣的材料，在不同的廚師手中，可以煮出營養一樣，但味道不同的菜色。這個比喻應該夠說服力吧！

憑BB的出世紙，加入了雀巢天地，訂了4箱NAN HA 1，足夠BB食到6個月大。2號及3號奶粉已經沽清，算了吧，希望到時BB腸胃好一點又可以食固體食物時，再給他轉奶粉。

 

 

轉奶粉

我唔係醫生，亦唔係營養師，極其量只係個讀過吓書嘅師奶；但，我係個母親，肯定會用盡自己嘅能力去為我BB做到最好，給他最好的東西。

我和老公都有輕度乳糖不耐症(Lactose Intolerance；90%亞洲人有不同程度的反應)，不排除會遺傳給下一代。我當然知道市面上有註明沒乳糖(Lactose Free) 的奶粉出售，但需求實在太少，非但難買，又沒找到幾多用家意見。後來又見過有科學家在文章指出，嬰兒有乳糖不耐症的機會很低。原因係人與生俱來係哺乳類動物，要食奶先會長大，即使人奶都含乳糖，除非經醫生用血液化驗証明BB真係無可能食奶，否則無須要選用無乳糖奶粉。反而BB到6個月左右，慢慢對奶類製品或蛋白質產生敏感反應就不出為奇，到時就真係要小心選擇食物了。

就係咁，我決定先比BB食S26。在醫院其間BB食奶食得好好，出世第二日每餐食到90ml，又唔見姑娘話有問題，所以回家繼續餵S26。食S26大約十日後，開始覺得便便漸漸變少了、變硬了，陪月姐姐提議轉奶粉。第一天，兩餐S26一餐能恩；第二天，一餐S26一餐能恩；第三天，全能恩。效果好好，便便正常，一日一次。

當時家中有兩罐婦科醫生給我的金裝能恩試用裝。見BB食得好，於是去超市上貨。大約食了十天，發現BB便便越來越稀，好似肚屙，一天屙兩三次，有一天竟然屙水。我和老公都好擔心。

碰巧當天我帶BB去兒科醫生處做例行檢查。將故事告訴醫生；她認為BB有乳糖不耐症的反應，但同時不主張BB捱一針抽血化驗，穩陣起建她著我們幫BB轉食豆奶粉。

我唔鐘意拖泥帶水，醫生叫轉，我就即時轉。轉的是惠氏愛兒素(Nursoy)。個人覺得此豆奶粉有陣草青味，我自己唔係好接受到，亦覺得BB不太喜歡，所以試過一次全豆奶，BB唔肯飲之後，我就兩溝，一半能恩溝一半豆奶。佢肯飲，飲了三餐之後，雖然BB有便便，沒有屙水，但好似有點硬。我有打電話問過醫生，她叫我唔好兩溝，但可以用水開稀一安豆奶，唔需要跟足罐上面教的開調比例，令便便有多點水份及變軟。

我同意唔應該兩溝，牛奶同豆奶根本就係兩種不同的東西。但問題係，全豆奶陣味太難頂，即使開稀了，味道亦一樣。加上，罐上寫明此豆奶粉「適合肚瀉康復中」嘅BB，換句話說，即係有止瀉作用，甚至令BB便秘。我兩溝餵了3天，BB的便便係正常，一日一次。但，我始終唔想長期兩溝，結果我再為BB轉了美贊臣無乳糖配方(LactoFree)奶粉。

 

 

對我的BB來說，這是一個極錯的選擇。既然是無乳糖，我以為此奶粉必定適合我的BB。美贊臣無乳糖配方(LactoFree)奶粉沒有異味，所以我沒有溝能恩飲用。BB肯食，我認定這是我終極的一轉。食了兩餐，BB在他通常會便便的時間，沒有便便。過了一夜，我再餵了一餐無乳糖配方，感覺BB有便意，但屙唔出。我意識到有問題，陪月認為有探肛來增強便意的必要，於是用綿花棒加凡士林輕輕放入肛門，我們見到黃色的便便在肛門入口處進出不得，BB滿面通紅，辛苦之極。我們惟有用綿花棒撩大便出來，很硬，就像黃色石仔一樣。在沒有任何選擇下，我即時放棄此無乳糖配方，轉回豆奶溝能恩。

又過了一天，便便沒有好轉。陪月繼續用綿花棒撩BB的肛門，希望可以清除因無乳糖配方而造成的所有「硬屎」。當日探肛三次，BB肛門谷到有血絲。即使轉回豆奶溝能恩，再過了一天後，陪月還是要幫BB探了兩次肛，BB才自然屙出便便。自覺是自己令BB受苦，我不知哭了多少遍。

BB未滿月就攪成咁，我好內疚。同時，我好想知道究竟問題出了在那裡，好想找出解決方法。思前想後，想起那兩罐來自婦科醫生及從超市買回來的「金裝能恩」。我才醒起它們的英文名稱是有分別的。來自婦科醫生的是NAN HA，從超市買回來的是NAN PRO。

能恩HA vs 能恩PRO

NAN HA的HA代表Hypoallergenic，罐上標明蛋白質係100%Whey，屬低敏配方。而NAN PRO就沒提供Whey和Casein的比例。上雀巢澳洲的網站發現，NAN HA已於2012年6月全球停止生產。和我的遭遇一樣，有不少用家在討論區表示，在完全唔知情底下，令BB轉食了NAN PRO而肚瀉。雀巢澳洲的網頁有解釋停止生產NAN HA是與奶粉質量無關，只係唔想浪費資源。事實係咪咁，無從稽考。生意角度想，無理由隻奶粉賣得好好地要停產。我有考慮過會唔會NAN HA條Formula本身有問題，係咪應該不惜一切去找貨源。就是這個原因，亦經朋友介經，我買了S26 HA給BB飲。

 

 

S26 HA的罐上無寫明Whey和Casein的比例，亦無清楚表示是否Hypoallergenic配方，但就有話係Partially Hydrolysed同Hypoantigenic。我唔係好識呢兩個Term的意思，靠估將它的HA和它罐上標明的幾個中文字「低敏配方」與Hypoallergenic扯上關係。這隻奶粉我用了5天，BB便便一日一次，但比豆奶溝能恩仍然是硬了一點。其實我可以繼續用落去，觀察BB反應；但此奶粉比我感覺有太多Unknown，所以最後我還是讓BB轉回NAN HA (1號)，一直食至現在。

這就是我的BB在出生後四星期內轉7隻奶粉的經過。無做過任何檢驗，但我相信我的BB多少係有敏感，待他長大一點我會帶他去做檢查。順帶一提係我有留意美贊臣的Nutramigen奶粉。聽說既是無乳糖又係100%Whey的特別配方，適合超敏感BB。我好想試一試，但我從未在超市或藥房見過。有人告訴我，此奶粉要醫生紙才買到；我有問過醫生，她一句答我「唔需要試」就算了，我亦沒有追問下去。