深圳不育不孕診療 Fertility Treatment in Shenzhen

當了全職媽媽半年，有得亦有失。

和老公獨處的時間比從前大大減少了，即使我們放堅決安排逢星期五dates night，兩公婆外出candle night dinner或看電影，感覺從不自在。雖然只是出外兩三個小時，我們內心其實都很想回家陪BB玩。

生活習慣都變了，是好是壞，只有當過爸媽的人能定斷。希坐同老公的感情唔會變。個人覺得這種感覺十分奇妙，有了BB後，時間好像過得很快，而且我們都好似比以往快樂。

但願所有想當爸媽的人，都如願以償，感受其中。

最近我路過深圳，見到機乎每個地鐵站內都掛上同一樣的廣告。我被「不要放棄當爸媽的願望」、「不育不孕診療」等字眼深深吸引著。在此分享資訊，讓各位有心人能進一步了解情況；至於是否有信心光顧，請自行定奪。

Shenzhen Fuhua ITWM Hospital

深圳福華中西醫結合醫院 www.fhbyby.com


 

針灸助孕講座

 

 

剛在報紙看到。查詢及報名：電話27233669 (www.jjcmclinic.com)



懷孕之苦

我有咗5個月喇，一切已穩定下來。可以繼續寫我的Blog。

有一些經歷，我永遠不會忘記。或者有一日我會比BB睇返呢個Blog，讓他知道爸爸媽媽帶佢來呢個世界一啲都唔容易。

懷孕之初，老公故然開心，但因去年的不幸，我們的心情一直都未敢太興奮。為咗安胎，我沒有返工，除咗回診所覆診外，完全唔敢出街。5 week都未見到BB心跳，5W6D黃昏仲有啲粉紅色分泌，即去仁安睇急症。當時情況唔算驚嚇，無越流越紅嘅跡象。我一心諗住仲差一日就6 week，正常應該見到BB心跳，決定去私家醫院睇急症係想用錢買個安心。點知醫生用陰超 (Transvaginal Ultrasound) 照咗五分鐘都係未見有心跳。連醫生都話唔正常。回家，即喊。

6W4D，我帶著等判死刑嘅心情回診所覆診。因為前幾天見過紅，為勉陰超會剌激傷口，醫生決定照肚 (Abdomenal Ultrasound)。儀器一放上肚就見到有嘢閃閃吓，醫生即時話：「有心跳啦，唔駛擔心。」我同老公都鬆一口氣，然後我又忍唔住感動到喊。總算過咗第一關。

之後就係噩夢嘅開始。懷孕原來幾辛苦，頭3個月我喪嘔。所有傳說中會止嘔的東西我都試過，華梅、薑茶、梳打餅、Super Lemon 糖等等，根本無幫助。飲啖水都嘔，乜都食唔到，更惶論吃維他命丸。最能落肚係檸蜜，有盡量飲，但手腳皮膚仍乾到龜裂，嘴脣甩皮，便秘好嚴重。雖然有說孕吐係好現象，代表賀爾蒙水平高，但我12 week瘦了共15磅，老公勁擔心；擔心BB無營養喎！

其實BB當時只係好似花生咁細粒，需要極少營養。醫生話BB有優先權去吸收我嘅營養，只要我每日都有食過嘢就OK。連食完可能嘔返出嚟嘅維他命丸都唔需要補食返，費是食多咗仲衰。

到咗Week 14就無嘔喇。可以正常吃東西。

促進Bingo行動

我很感恩能成功Bingo。除了這是上天安排給我的緣份外，從醫學角度去理解，我相信針炙確是最關鍵的因素。

當然，由於我實在太想生BB，這個Cycle我額外做了一些事情。是科學、是八卦、是迷信，總之我依足長輩分附的一切去做。這裡我都一一列出來，希望藉此給索孕中的朋友多點希望：

(1) 每天依時吃Centrum孕婦維他命丸，另每天繼續吃400mcg葉酸和一粒baby asiprin；

(2) 老公則每晚飯後服Centrum多種維他命丸，增强體質；

(3) 每星期做兩至三次針炙；

(4) 為家添新碗筷，預意家中會有新成員；

(5) 摸大肚婆朋友個肚；

(6) 到觀音廟求子及攝太歲；

(7) 和老公一起瘋狂愛上吃帶子，取其意頭；
(8) 用過一次Pre-Seed。

飲食方面，這個Cycle沒有大轉變。我很討厭花膠那黏口的質感，無論煲湯抑或炆煮，我都沒甚興趣。加上西醫說我子宮夠厚，沒需要特別進補，所以今個Cycle如常只係飲過兩晚共兩碗花膠湯。反而因個人喜好，我每月月經乾淨後的5天早上起床都吃一小碗紅棗冰糖燉燕窩。雖然中西醫都說怕了現代燕窩含過多激素，甚至添加過量防腐劑，寧勸病人勿吃，以免補身變成傷身；但我相信家中的燕窩都屬上等貨，而且每次燉之前我都浸水過夜，然後再過清水最少三次，應該可以去除大部份不良添加劑，所以我一直堅持服用。只是今個Cycle有意無意，我隨手拿了家中的血燕而非白燕窩來燉，不知這又是否成功Bingo的因素之一。

運動方面， Day 1 至 14我都有嘗試在晚飯後去散步20分鐘，但，因為懶，真的不是每天都達標。經期的下半部就更加係零運動。

這就是我Bingo的經過，只屬個人經驗，吃藥前請向你的醫生查詢。

第6個Cycle: BINGO!

今個Cycle，因為過農歷年，我只係睇咗吉叔一次。除Folic Acid外，我開始吃Prenatal vitamins和做針炙。但，我沒去見婦科西醫、沒吃排卵藥Clomid、沒照超聲波、沒量體温、沒用紅D，所以完全唔知自己幾時排卵。雖然從Day 8起就隔日do do，但我都打定輸數。

Day 17我已經感到胸痛，提早咗。2011年8月小產之前我從沒有胸痛的問題，極其量來經前兩三天會有點肚谷或水腫。小產之後，每個Cycle我都有胸痛，每次都是大約從Day 20開始，胸的兩側一碰到就很酸痛，直至來經後才消失。我好擔心賀爾蒙失調，Estrogen過多又或 Progesterone過低，這都會令我失去受孕的可能。所以我想今個Cycle 天然啲，讓身體休息吓，然後下個Cycle去找醫生檢查清楚。

網上發現情况相似的人也不少。原來胸痛通常代表「已排卵」。胸前近乳頭痛就代表Estrogen過多，可能「無排卵」。胸前和胸側都痛的話就代表已排卵但Estrogen太多，而且Progesterone太少，兩種賀爾蒙平衡唔到。

我又擔心左邊輸卵管塞咗。上網睇醫學專攔，發現原來大自然好有規律、好公平，左右兩邊卵巢平均每年分別排卵6次。雖然未至於規律到一次左、一次右，但最壞情况都係一邊連續排完6次之後，另一邊就自動排其餘嘅6次。我擔心嘅係，我過去5個Cycle都係右邊排卵，如果今次或下次轉咗左邊排，而又咁啱左邊輸卵管塞咗，咁我就要再等多六個月才有機會懷孕。我唔可以讓事情這樣發生，放完假後一定要去照輸卵管，塞咗就揾方法通通佢。

個胸真係痛到唔可以接受。Day 28開始有時覺得個心跳得好快，好似被人打通任督二脈，啲血流得好快。心唸可能係做完針炙嘅反應，應該谷緊M。點知Day 30 M小姐都未嚟，再安慰自己可能今個Cycle因為無食藥，Day 17才排卵，所以應該Day 31 (= 17 + 14) 先會M come。再等多一日，驗一驗，原來Bingo咗。今日我有咗三個月喇，yeah！

針炙助孕

經朋友介紹，我開始了針炙治療。我光顧的是中環王翎懿醫師。據我了解，王醫師只接見女病人及體質虛弱的小朋友，最擅長生育、調經和減肥。收費都幾貴，HK$450一次，隔天一次，每次約30分鐘。Package十次HK$4,000。至今我做了六次，暫未見身體有特別反應。

王醫師因應經期不同階段給我施炙，下過針的穴位有：子宮（子宮兩邊）、足三里（兩邊膝下三吋）、三陰交（足內踝上三吋）及氣海穴（臍下三寸），每次都會在肚臍位放上艾灸盒（薰臍法）。我幾享受整個過程。不覺得痛，反而有舒壓的感覺；加上室內各種保暖設備，每次我都安然睡著了。但這不是我打算繼續治療的原因。

其實，在我去看孟愇醫師之前，我在港大中醫診所看過一位名叫陳潤球的中醫師。陳醫師幫我做過幾次針炙，每星期一次，針的穴位和王翎懿醫師給我針的一樣，分別是有搏上電極，幾次下來身體沒有特別反應但很舒服。問題是陳醫師認為針炙被西方醫學過份吹捧，一再强調針炙不及吃中藥，如只做針炙不吃藥，根本沒用。我從來沒想過不吃中藥，不太明白為什麼陳醫師會這樣說，只覺得醫師本人都對針炙沒信心，那麼我就沒無為對針炙抱有期望，加上我當時能成功約見孟醫師，所以放棄了陳潤球。這幾個月，我回想上次成孕的經過。當時我被西醫正實我患了輕度卵巢多囊症，雖然最終胎兒保不住小產了，但我確有懷疑其實是針炙幫了我排卵、幫了著床。這才是我決心再做針炙的原因。

仁安醫院網頁也有說明針炙的好處。主要的原因是基於針灸有舒經活絡、促進血液循環的作用，同時可刺激排卵，助於著床。外國網頁也有不少類似的資料，不妨上網看看。

但願針炙真的幫到我。

兩星期的等待 TWW

這14天的等待是痛苦的。我覺得自己開始有幻覺，DPO 7下腹有輕微抽搐的感覺，扯扯下、拮拮下，還持續胸痛，妄想是著床徵兆。其實每個月都是這樣的，但我總期望奇跡會發生。嘗試抑壓自己的衝動，等多幾天才驗，或能令自己享受多幾天疑似懷孕感覺。忍到DPO 11就忍不住，要驗一驗。在光線下照來照去，幻覺有淺線、有水印。其實，我根本不能辨出究竟有線抑或無線！

已經打定輸數，無嘢可以做，只能不斷禱告。再等多幾日，M小姐終於在DPO 14來探我。好唔開心！

第二次IUI

這是小產後第5個Cycle。我已經無再量體温了。其實量體温根本不能預測排卵期，只係排卵日過咗，然後體温升高，那時就知道唔駛再嘥力do do。量體温反而能準確預測經期，每次見到體温跌咗，知道又造人失敗時，就好大壓力、好唔開心。既然我已量了半年，知道自己每次排卵都在Day 14前後，咁我就無為再嘥心機了。

放完假，Day 13回婦科西醫處照超聲波，意外發現左右兩邊卵巢都有粒20 mm大嘅卵。醫生問我點解會咁，我都唔知，可能放假輕鬆啲，卵都好啲啩！幾個月都未見過左邊有卵喇，好開心，証明卵巢唔係廢咗，希望兩粒一齊排，比我有多個機會啦。醫生即刻幫我打咗Trigger Shot (Ovidrel 250mcg)，Day 14下午做iui。

做iui時，醫生有照多次超聲波，見到右邊粒卵已經排咗出嚟，等緊老公啲材料；左邊果粒就在排與不排之間，醫生話機會五五波，希望有奇跡啦。

第一次IUI

Day 12照ultrasound，右邊有粒14mm卵。太細，醫生唔建議我打trigger shot，叫我翌日返去再照才決定今個Cycle可唔可以做iui。好失望。上個Cycle明明Day 11已經有粒24mm，今次仲遲一日去照都係得粒細嘢，點解？點解？

望天打卦，Day 13再照，粒卵大咗好多，有19mm(正常一日長大2-3mm)，唔知究竟有無度錯。即刻在肚皮打咗針Ovidrel 250mcg。醫生話呢支針無乜副作用，只係好似射箭咁，幫粒卵彈遠啲，打針後30-36小時就會排卵。醫生仲話19mm其實唔太理想，希望拖到30小時之後佢會再長大啲時才做iui (一般來說打針後24小時就做得) 。回家用紅D驗過，無線，奇怪！

Day 14老公到偉澤放低啲寳貝，兩個小時後我去攞返，帶到診所做iui。過程好似做pap smear，大約五分鐘攪掂。唔痛。之後敞在床上休息三十分鐘就可以離開等派彩。我知道中獎機會好低，大約25%，由Clomid到照ultrasound到打trigger shot到做iui，用咗約六千蚊，當幫老公慳返啲力又買個希望囉。

結果M小姐Day 28準時來探我，我當然失望，但我會再接再厲。

腹部按摩

前文提過吉叔建議我和老公定期做推拿。事實上，我自八月小產後己開始有按摩習慣，現希望在此分享經驗。事情是這樣的：

小產刮宮後，醫生拿了胎囊組織去化驗。結果發現有「腫」的跡象。醫生說這一般是因為母體血液循環不理想，血中的營養和氧氣未能充份帶到子宮，導致胎兒缺氧而停止生長。聽完，我心裡覺得好唔安樂、很難過；醫生形容這就好像是我和BB爭食，我爭贏了，但BB餓死了！雖然醫生有安慰我，說我的情况也很普遍，未必是我身體有問題，亦不是老公給我的材料有問題。原因是，在超聲波之下我們從未照到過BB的心跳，這代表胚胎本來也發育得不好，未能成形，所以自然流產。

可是，「爭食」這個比喻真的令我很不安。我是大人，一定爭贏小朋友，對嗎？

為免同樣情况再出現，自此醫生要我每天服用Baby Aspirin(即81毫克低劑量阿士匹靈)來通血管，要一直服至懷孕後三個月，確保血液能順暢地流入子宮，給胚胎血氧。

我很明白Baby Aspirin能給我的好處，但正常人都知道長期服食此藥或會引致胃潰瘍甚至傷口大量出血等情况。我的確渴望再次懷孕，但誰能保證這會何時發生？！如我未能於短期內成功懷孕，那麼我有可能要經年累月地服藥；這絕非上策。

為此我做了不少資料搜集，發現按摩能促進血液循環。其中有一套名為瑪雅腹部按摩 (Maya Abdominal Massage for Fertility) 的古方，更聲稱能保健子宮，增加受孕機會，甚至可以治療男性前列腺腫大，及勃起功能障礙等。

此方一般可在臨睡前自己在床上進行。方法是排空小便，仰臥床上，全身肌肉放鬆，排除雜念，左右手指平排，指尖貼附在肚臍部，順時針方向按下，由臍部逐漸擴大到全腹，然後縮小按摩範圍，回到臍部。緊記來經前五天至經血乾淨前都不宜做此按摩，怕引致出血過多或弄傷子宮。詳細方法可按此。

我沒恆心自己按摩，只找師父幫我每天全身按兩小時。第一個星期，效果頗顯著。在沒有額外滋潤的情况下，我的腳後跟乾燥龜裂問題改善了不少，好明顯與血液循環有關。但一個星期後，我對按摩似乎沒有進一步的反應，乾燥龜裂問題漸漸重臨。

這是我對索孕期間按摩的一點心得，有興趣的話，不妨試試。

吉叔 (3)

今天Cycle Day10，我第二次見吉叔。把完脈，在他正在寫藥方之際，他說我一個月只需見他兩次；即使今次只給我七天藥，下星期也不用再去見他。他要我「靜觀其變」，若未能成孕，就於下次經期的第三或四天去見他就可以了。

我相信這說明我的健康一切正常，所以吉叔對我的要求比較簡單，藥不用多服，也不用額外進補。今次的處方如下：

魚古        鹿角膠    山萸            甘草            黨蔘        火麻仁

首烏        仙茅        羊藿葉        玉桂皮        大黃

吉叔說這方作用是促進排卵及著床。我帶藥方到協德榮執，每劑盛惠50元。由於每人體質有異，我不在此公開藥材份量，請自行請教中醫。

拿這劑藥和孟煒六月份開給我的排卵藥比較，這劑藥內含的鹿角膠用量比較少，藥性應該相對温和，是好是壞我不懂評價，但既然這個Cycle決定去找吉叔幫忙就要對他有信心。希望成功啦。

另外，今個Cycle我也有服Clomid。吉叔說只要中西藥是隔開兩小時進服就沒有問題了。

至於我老公，咳還未痊癒，哮喘當然也未能「斷尾」，我們也有心理準備下一代也會患上哮喘。西醫認為做愛能令皮質醇升高，有助舒緩哮喘病情。這方面我們也有向吉叔請教。他給我們大派定心丸之餘，亦在老公的藥方裡加重補氣成份，助他提昇表現。

吉叔今次給老公治咳的處方如下：

魚古        干姜        制附子        紫菀        款冬        魚腥草

膽星        川貝        糯稻根        黨蔘        百部        浮小麥

田七        北芪        女貞子        甘草

去協德榮執藥，每劑盛惠83元。

吉叔 (2)

吉叔是個健談的人，基本上每問必答。他又主張戒口，要求病人只進食他指定的東西，所以在他的診所裡不難發現他的書架上放有不同的水果和保健品，這些都是他用來推介給病人的。

我算幸運，吉叔說我沒什麼需要戒，只係要絕對戒飲港式奶茶。

但我老公就和大部份病人一樣，被要求水果類只吃地利蛇果(Red Delicious Apple) 和木瓜。吉叔的書架上放有地利蛇果的樣本。地利蛇果和其地蘋果不同之處在於它酸性少，不會刺激腸胃，而外表就是全深紅色，底部有明顯五凸點，所以台灣人稱之為五爪蘋果，而香港最常買到的品牌地利蛇果是「華盛頓蘋果」。

地利蛇果 - Source: wikipedia


第二樣他介紹我老公「吃」的是六味地黃丸，指定要北京同仁堂出品。吉叔沒講明此《北京同仁堂六味地黃丸》的實際作用，只說他親自服食和比較過各品牌的出品，同仁堂的出品最好。上網找資料，有的說這藥可補腎壯陽，有的說不可以亂服。我們想，既然去得睇吉叔，就要信佢。而佢又推介這藥，所以決定一試，效果有待商榷。

第三樣是蜜糖，指定是康維他麥蘆卡蜂蜜(Comvita Manuka) UMF10+ 或以上，主要是用來清肺潤喉止咳。不用開水，每天口服一至兩匙羹；吞下蜜糖後才喝一點暖水送口。效果似乎不錯。

第四樣是冬蟲草丸，指定是NuSkin旗下的CordyMax Cs-4。吉叔說這比買真正的冬蟲草化算，成效又差不多。但同時，他說冬蟲草遇熱後會降底藥效，所以不宜加熱煮，因此最好服用冬蟲草的方法是從冰箱取出5至10條蟲草，用暖水稍為沖洗後即入口咬嚼或磨粉後沖水飲服。我不清楚冬蟲草丸的製造過程，成份又是否曾經加熱處理。所以我想，如果經濟許可的證，還是買真正的冬蟲草比較好。

第五樣他介紹的是中式推拿，指定深圳福田區某按摩中心，還給我們按摩師的卡片，要我們每星期最少連續按摩四小時，主要是舒筋活胳及促進血液循環。我們在港已不時按摩，反甚少到深圳，所以暫未光顧吉叔介紹的按摩中心。

吉叔 (1)

今天終於到我去睇吉叔。我早上去攞籌時，見到佢鬧到個女病人喊。雖然我不知道他們的談話內容是什麼，但此情此景令我覺得見吉叔好有壓力。本來打算下晝單拖去輪候，結果我都要老公陪我去，壯下膽。

這是我第一次見吉叔，好彩佢嘅問題我全部都答得上，所以無驚無險，五分鐘開完藥方就走得。問題都係問「今天經期第幾天？」「通常經期幾多天？ 」，我懶醒帶埋體温表去，點知佢睇都無睇過，就叫我一星期後覆診。唔可以遲亦唔可以早，七日後再見。吉叔給我的藥是幫助促進子宮健康，藥方如下：

山萸        甘草        鹿茸        浙貝        魚古        玉桂皮

大黄        黨蔘        雲苓        火麻仁     羊藿葉     首烏

我帶此方到協德榮執藥，盛惠每劑46元。

《吉叔湯》材料

別外，吉嬸叫我同老公記得要飲《吉叔湯》，加瘦肉、花膠、蠔鼓一齊煲兩個鐘，一個星期最少飲兩次，老公要食晒啲蠔鼓，話會快啲造人成功喎。我去藥材舖買咗包預早執好嘅《吉叔湯》，內含黨參、雲苓、淮山、杞子、蓮子、百合、南北杏、圓肉，都屬家庭常用藥材，可能平時大家都有飲這些材料煲嘅湯。既然係咁，我應該唔會再專登去買這湯包。

索孕聖手 治咳專家 劉逢吉

久仰吉叔大名，但我食中藥多年又在上環上班都未去見過他。緣份今天來到，主要是因為從網上得知，原來吉叔除了醫生仔了得，醫咳更吧閉。

枕邊人一直感冒，翻覆不好，尤其每年一到冬季，病情更甚，早晚不斷狂咳，加上他有哮喘病，尋遍中西名醫，心肺科、耳鼻喉科、呼吸科都看過了，但始終不能斷尾，令我心煩不已。最近因我在網上搜尋《傷寒論》內的名方時，發現吉叔的治咳故事後，就決定要和老公去找他把一把脈。

攞籌並非想像般難。先到他的辦公室攞籌，在指定時間回去輪候即可。據我理解，吉叔上午和下午分別可看50個症，這就是籌上寫上號碼的原因。每天早上八時半開始派籌至下午一時。應診時間就由早上九時到晚上六時半。如果你並非在附近上班或居住，又想即場攞籌即場見醫師，那麼你越早去攞籌越好。舉例，若你八時半取得頭輪籌，那麼你就應該可以在十時前見到吉叔。當然，如果當天個別病人的症狀複雜，診症時間會相對較長，那麼等候的時間也會較長。

坊間流傳有藥材舖代吉叔派籌甚至預約登記，那是個誤會。其實藥材舖的籌也是他們早上派人到吉叔的辦公室取的，主要是留給藥材舖的客人。除非你不去此藥材舖執藥不可，否則還是直接到吉叔處攞籌比較好。

吉叔奉行「先戒口、後吃藥」的宗旨。無論治咳或索孕也要戒口。除鴿、鵝、鴨、蝦、蟹例牌要戒之外，還要戒所有橘子類水果(橙、柑、檸檬、柚、桔)、葡萄、番茄、蜜瓜。更不可飲瓜菜煮之湯水，包括粟米湯、西洋菜湯、花旗參湯、雪梨湯、萍果湯等，尤以白菜豆腐湯為甚。另外禁飲奶茶。這通通都在吉叔的網頁可以找到。我建議去見他之前先上網看看。

吉叔為人隨和，我們和他有傾有講。我個人很欣賞他的自信，他說他一定可以醫好我老公；這實在對病人及其家人的心理質素很有好處。至於他開的藥方，成份都是大路的藥材，但比之前另外一位醫師開的《傷寒論》小青龍加減方有很大出入，証明吉叔對我老公病情的看法與別的醫師不同。我們帶藥方到附近的協德榮執藥，盛惠每劑70元。成份如下：

浮小麥      炙麻黃       川貝          款冬          紫菀         甘草 
百部          細辛          北杏          魚腥草      辛荑花      桂枝      
法夏          陳皮          糯稻根      馬勃          魚古

由於每人體質不同，我不在此公開用藥份量，你可自行請教中醫。

至於我，吉叔給我把完左右手，然後我告訴他我最近發生的事，他跟著就說我隨可以再開工。但我今天cycle Day18不宜吃中藥，所以他叫我下個cycle Day3或4陪老公覆診時再去看他。我估他認為我沒問題啩！？

等

幾經辛苦才過了三個cycle，孟煒和西醫都說我ready了。我才鬆了口氣。

小產後第一個cycle最可怕，M小姐準時到，但流了六日啡，一點血的跡象都沒有。我以為手術失敗令我患上了Asherman's Syndrome，以後都無得生。西醫唔肯睇我，話可能我身體未復元，這次M唔算數，要等下個有血的正常cycle完咗才去覆診。或者我真係緊張咗，但而家啲婦科醫生太好生意，有錢都唔想賺，真係咩世界？！

好彩第二個cycle就正常返，day12去覆診照到右邊有粒15.6mm的卵泡，醫生開了Cardiprin (即Baby Aspirin)、Estrofem、Lutenyl同Clomid比我。我諗佢開得Clomid就即係叫我下個cycle先開工，加上孟煒和大埔神醫都叫我再等多一個月，所以我無食Estrofem同Lutenyl這兩隻賀爾蒙藥，只吃中藥調理，積極備戰。

第三個cycle我食咗Clomid，Day11覆診照到右邊有粒24mm的卵泡。醫生說我對這排卵藥的反應比預期好，即刻同我打HCG trigger shot (即破卵針)，安排翌日早上做iui。這一切都比咗好大希望我，點知當我準備填表時，因我告訴他們我唔見咗結婚證書，唔能提供我同老公係合法夫妻的証據，所以他們唔比我做iui。我理解嘅，這是法例要求。係我衰，懶去補領。失望囉。

我Bingo咗！但係。。。。。

幾經辛苦，過咗兩個半月。減咗肥、食咗中藥，但仲未bingo，壓力好大。正想叫老公去驗精之際，M小姐突然早咗10日嚟。從來未試過咁，好擔心，即打電話約婦科西醫。

六月頭，Day 8去見佢。照完超聲波佢叫我今個月唔駛徙心機，因為我完全無排卵，一定唔會bingo。我好想喊，點解會咁？！今次醫生終於肯比藥我。當時我成個人癲晒，好嬲好唔開心，明知係咁就唔好徙我三個月時間，一早比藥我咪仲好。而家佢要我day 12開始食Estrofem, 然後day 16 加埋Provera (通經藥) 一齊食。佢話想我今個cycle快啲完，下個cycle嘅day 2 至 day 6 就食排卵藥Clomid，希望幫到盡快懷孕。

見到啲藥，我返而開心咗，因為西藥始終快見效啲，彷彿比咗個希望我。咁究竟喺西醫嘅角度我係咪有卵巢多囊症 (PCOS)？醫生說10分算最嚴重，我的情况最多值2分。咁唯有見步行步啦。

我day 14 去睇孟煒。同佢講完西醫話我「乜卵都無」之後，佢就開咗六帖排卵藥比我，唔駛等下個cycle食Clomid先排卵。當晚食完一帖中藥後dodo，就係咁，day 30 我驗到自己有咗！我勁開心，但係。。。。。。

同時勁擔心，因為開心唔夠三個鐘，我就發現有流啡的問題。即去見醫生，抽血，HCG=9。呢個數無代表性，醫生話可能係太早，乜都驗唔到。第二日再驗，HCG=18；對於確定懷孕，呢個數仍然係太低。過多三日，HCG=180，終於有望了。

可是一直也流啡，甚至間唔中流兩滴血。唔知點解，我感覺到唔太樂觀。一個星期後覆診，HCG=3600，仲有流啡，照到胎囊但無心跳。十日後西覆診，胎囊長大咗但依然無心跳。再過一個星期，胎囊縮小。就係咁，當晚做了刮宮，一切成泡影，那是9W1D。

醫生說我沒做錯任何事，此情况很普遍，醫學名稱叫Blighted Ovum (俗稱「空心蛋」)，五個孕婦有一個係咁，屬於自然流產，唔會影響到下次嘅機會喎。

講就簡單，但我真係好傷心。其實對於我來說，今次屬於意外懷孕。成個cycle只係day 14 dodo過，我都唔知究竟係孟醫師的藥力勁，抑或西醫斷錯症話我無排卵，總之我無諗過會中。或者係天意，時辰未到，有咗保唔住。希望身體快啲好番，再嚟過。