Android Apps check 排卵

我說過我好討厭人用智能手機。尤其是見到人過緊馬路或食緊飯嘅時候仲用嚟打機，我就有啲上火。最常見係搭地鐵返工時見到人用iPhone，打機、玩msn、收email等等。其實在日本，地鐵車廂內明文規定唔用得手機，怕幅射射親懷孕中嘅婦女，又怕你講電話嘅嘈音會嘈醒你隔篱合緊眼瞓嘅乘客。雖然無話用咗就會被罰錢，但眼見日本人都願意合作，我就諗究竟香港人係咪真係比日本人忙？！

智能手機從來唔係我杯茶。我唔係喺屋企就係公司，internet任上，搭車時我寧願瞓吓。但我老公係電訊公司高用量客戶，每次續約電訊公司都送部全新手機過佢，而我就係最終受益人。就係咁，我「被迫」用緊部Galaxy。

用咗大半年，我對佢都無乜感覺。直到最近，因為想生BB，醫生要我做體温圖表，我才發現佢好幫得手。

本來我係數學高手，淨係睇data我都知個圖會點，根本無需要plot graph。但Dr. Meng要我下次帶個圖比佢睇，身為病人嘅我惟有就犯。印張blank form出來，一日plot一點，蛇都死啦，遲早連張form都唔見理；儲埋一個月嘅data，月尾才plot又驚眼花攪亂晒。最近竟然比我發現有個app(Android 同 iPhone 都有，勁啲可以用Fertility Friend，但要先上網登記)可以解決所有問題，仲可以預測排卵期，下次覆診淨係帶部手機去就得，方便又環保。

可能你會認為我後知後覺，但我現在真係要對智能手機寫個「服」字。